როგორ ხდება მსჯელობის უნარების განვითარება? 
მსჯელობის უნარების განვითარება შესაძლებელია და სასურველიცაა იქცეს ყოველდღიური ცხოვრების ნაწილად. ბავშვთან ურთიერთობის პროცესში მნიშვნელოვანია მათი წახალისება. ქვემოთ მოცემულია რამდენიმე რეკომენდაცია, რომელიც ამის გაკეთებაში დაგეხმარებათ: 

• ისაუბრეთ ემოციების შესახებ (როგორც საკუთარი, ისე გარშემომყოფების)

დაეხმარეთ ბავშვს ემოციის აღმნიშვნელი სიტყვების დასწავლაში. გაახმოვანეთ მისი განცდები. მაგალითად: „ძალიან გაბრაზებული ხარ, იმიტომ რომ სკვერიდან მივდივართ.“ „სევდიანი ხარ, როდესაც ბებია სხვაგან მიდის“’; ასეთი მიდგომა ეხმარება ბავშვს საკუთარ ემოციებში გარკვევასა და მათთან გამკლავებაში. მოახდინეთ გარშემომყოფთა ემოციების სახელდებაც და ისაუბრეთ მათზე. მაგალითად,  უთხარით:“ ეს გოგონა სიხარულით ზემოთ-ქვემოთ ხტუნავს და იღიმება, როგორ ფიქრობ, გახარებულია?“; წიგნის კითხვისას, დაუსვით ბავშვს კითხვები პერსონაჟის განცდების შესახებ: „როგორ ფიქრობ, სიბნელის ეშინია?“

• დასვით ბევრი შეკითხვა ყოველდღიური აქტივობების მიმდინარეობისას:  

დღის განმავლობაში, ბავშვთან საუბრისას გამოიყენეთ “რატომ“ შეკითხვები: „როგორ ფიქრობთ, რატომ სცვივათ ხეებს ფოთლები?“, „რატომ მოდის წვიმა?“ 
ასეთი კითხვები ბავშვის აზროვნების სტიმულირებას ახდენს და აგრძნობინებთ, რომ დაინტერესებულნი ხართ მათი იდეებით. 
აუცილებლად გამოიყენეთ ღია კითხვებიც. იმის ნაცვლად, რომ ავტომატურად გასცეთ პასუხი ბავშვის მიერ დასმულ კითხვებზე, წაახალისეთ მისი კრიტიკული აზროვნება და შეკითხვას შეკითხვით უპასუხეთ: "შენ რა მოსაზრება გაქვს? შენი აზრით რაშია საქმე?“ ბავშვის ნებისმიერ პასუხს, იქნება ის სწორი თუ არასწორი, პატივისცემით მიუდექით. შეგიძლიათ უთხრათ: "ეს საინტერესოა. მითხარი, რატომ ფიქრობ ასე."

• დააკავშირეთ ერთმანეთს წარსული და აწყმო. 

გაავლეთ ლოგიკური კავშირები ბავშვის ყოველდღიური ცხოვრების მოვლენებს შორის, მაგალითად: „ ქურთუკი იმიტომ უნდა ჩაიცვა, რომ არ გაცივდე.“, „აუზზე პირსახოცის წაღება იმიტომ გჭირდება, რომ ტანი გაიმშრალო.“ 

• დაახარისხეთ და დააჯგუფეთ საგნები დღის განმავლობაში

შეასრულეთ ისეთი აქტივობები, რომლებიც მოითხოვს ნივთების დაჯგუფებას საერთო ნიშნის მიხედვით. მაგალითად, დაახარისხეთ სარეცხი. სთხოვეთ ბავშვს თეთრი ფერის ტანსაცმელი გამოაცალკევოს ფერადისგან, ან ცალ-ცალკე დააწყოს წინდები, მაისურები და შარვლები. სათამაშოების ალაგებისას სთხოვეთ მანქანები ერთ თაროზე დაალაგოს, წიგნები კი მეორეზე.
და ბოლოს, ყველაზე ღირებული, რაც შეიძლება ბავშვისთვის გააკეთოთ, ეს საკუთარი კრიტიკული აზროვნების მოდელირებაა. მოზრდილები მიდრეკილნი ვართ იმისკენ, რომ მსჯელობის უხმოდ გამოვიყენოთ, შესაბამისად ბავშვები მხოლოდ საბოლოო შედეგს ხედავენ. 
ამის ნაცვლად, სცადეთ ხმამაღლა ისაუბროთ პრობლემების გადაჭრისა და არჩევანის გაკეთების პროცესში. მაგალითად, შეგიძლიათ თქვათ: „მე ვაპირებ სახლში სხვა გზით წავიდე, რადგან მაღაზიაში უნდა შევიარო. “ 
შეეცადეთ გამოავლინოთ თანმიმდევრულობა ბავშვისთვის მსჯელობის უნარების მოდელირებისა და წახალისებისას.